Glerárkirkja var vígð þann 6. desember 1992 en hlutar hennar höfðu þó verið í notkun síðan 1987. Árið 1988 var farið að huga að kirkjuklukkum og snemma árs 1989 voru kynnt tilboð í þær. Eftir að búið var að hlusta á nokkrar klukkur af segulbandi, stóð ein tegund eftir og var gengið frá pöntun á henni seinna það ár. Klukkurnar voru keyptar frá Dansk kirkeklokketeknink og kom allur búnaður frá Danmörku. Klukkurnar sjálfar voru hins vegar steyptar í Hollandi og eru þrjár talsins. Sérfræðingur frá seljanda kom til að setja þær upp og var þeim hringt í fyrsta sinn 2. september 1990.¹ Klukkurnar eru staðsettar í porti hátt yfir kirkjuskipinu. Þær eru illaðgengilegar og því eru ekki nærmyndir af þeim hér á vefnum. Í september 2002 var svo þak byggt yfir klukknaportið.

Stærð klukknanna er þessi:

• Stærsta. Þyngd: 690 kg. Þvermál: 104 cm.
• Mið. Þyngd: 400 kg.
• Minnsta . Þyngd: 285 kg. ²

• 30 mín fyrir messu er minnstu klukkunni hringt í eina mínútu.
• 15 mín fyrir messu er tveimur minnstu klukkunum hringt í eina mínútu.
• Við upphaf messu er öllum þremur klukkunum samhringt í þrjár mínútur.
• Við lok messu er öllum þremur klukkunum samhringt í þrjár mínútur.
• Við lok hjónavígslu er slegið ört á miðklukkuna.
• Fyrir útför er líkhringing hringd í 3 mínútur. Að henni lokinni eru stundaslögin hringd og svo bænaslögin (3 x 3 slög)
• Við lok útfarar er líkhringing hringd frá því að burðarmenn byrja að snúa kistunni og þar til hún er komin í bílinn.

Klukkurnar slá stundaslög á heila tímanum.

Upptaka: Guðmundur Karl Einarsson, 24. og 25. júlí 2016
Kirkjuvörður: Hermann Ragnar Jónsson
Þakkir: Sr. Gunnlaugur Garðarsson og sr. Jón Ómar Gunnarsson